Tinopolis

Tinopolis, sydd â’i bencadlys yn Llanelli, yw’r cwmni cynhyrchu teledu mwyaf ym Mhrydain y tu allan i Lundain, yn ôl arolwg gynhaliwyd yn ddiweddar yng nghylchrawn Broadcast.

Mae yna dair prif rhan i’r busnes - yr adran gynhyrchu rhaglenni sy’n gweithio i gleientiaid nid yn unig yng Nghymru a Lloegr, ond hefyd i ddarlledwyr ar gyfandir Ewrop a’r Iwerddon, yr adran animeiddio sydd o dan ofal Dave Edwards creawdwr cyfresi poblogaidd megis Superted a Hot Rod Dogs a’r adran rhyngweithiol sy’n darparu gwasanaeth ar y rhyngrwyd i gwmnïau a sefydliadau cyhoeddus ym mhedwar ban byd.

Erbyn hyn mae’r tair adran yn aml yn gweithio gyda’i gilydd, gan fod sawl cytundeb yn gofyn i ni gynhyrchu lluniau symudol ac animeiddiedig ond wedi eu darparu ar y we fyd eang. Enghraifft o hyn yw’r gwaith mae’r cwmni newydd orffen i Awdurdod Datblygu Cymru - www.projectdynamo.com - gwefan i annog pobl ifainc i fentro i fusnes ar eu liwt eu hunain. Un o gryfderau’r cwmni yw’r gallu i weithio’n ddwyieithog, gyda mwyafrif y staff yn siarad Cymraeg a’r Gymraeg yn brif iaith y swyddfa.

Mae’r cwmni’n falch o gael ei wreiddiau yn y rhan yma o Gymru, a dyna pam y penderfynwyd ar yr enw Tinopolis - term a fathwyd gan bobl Llanelli i ddisgrifio eu tref pan oedd y diwydiant tin yn ei anterth.