Sgiliau Dwyieithog
Mae cyflogwyr Cymru yn rhoi gwerth mawr ar sgiliau dwyieithog, yn ôl ymchwil jobcymru. Wrth holi 300 o gyflogwyr yng Ngheredigion, Powys a Meirionnydd am eu gofynion ac anghenion sgiliau yn ddiweddar, atebodd 70% ohonynt eu bod yn ddelfrydol yn dymuno bobl a allai gynnig dwyieithrwydd yn sgil gwaith ar gyfer rhai o’r swyddi yn eu cwmnïau.
Mae yna nifer o resymau pam fod cyflogwyr yn hoffi gallu cynnig dewis iaith
- Gofal y cwsmer – mae cwsmeriaid yn hoffi cael dewis iaith ac mae cwmnïau yn sylweddoli mai drwy blesio’r cwsmer mae llwyddo mewn busnes
- Ansawdd gwasanaeth – ar gyfer pob math o wasanaeth mae gallu cyfathrebu yn ddwyieithog yn gallu hwyluso’r gwaith a gwella ansawdd e.e. Iechyd, Heddlu ac ati
- Deddf yr Iaith Gymraeg, sy’n ei gwneud hi’n ofynnol bellach i gwmnïau yn y sector cyhoeddus gael polisïau iaith Gymraeg.
"Mae’r amgylchiadau pryd y mae bobl yn cwrdd â’r heddlu yn aml o dan straen a phwysau. O dan y fath amgylchiadau mae’r angen i dderbyn gwasanaeth trwy gyfrwng y Gymraeg yn gallu bod yn bwysig iawn. Mae hefyd yn gwella’r berthynas rhwng yr heddlu a’r cyhoedd ac yn gwneud i bobl deimlo yn fwy cyfforddus."
Prif Uwch Arolygydd John Lewis , Pennaeth CID
Heddlu Dyfed Powys
Defnyddiwch eich sgiliau dwyieithog – gallant fod o help i chi ym myd gwaith.
Mae cyflogwyr yn dymuno sgiliau dwyieithog ar wahanol lefelau – rhai yn gofyn am sgiliau ysgrifenedig da yn ogystal â sgiliau llafar, ac eraill yn gofyn dim ond am gyfathrebu gweddol syml ar lafar.
- Lefel 1 – dim defnydd
- Lefel 2 – peth defnydd e.e. ymysg y gweithlu
- Lefel 3 – cyfathrebu ar lafar â’r cyhoedd
- Lefel 4 – defnydd helaeth yn cynnwys defnydd ysgrifenedig
- Lefel 5 – rhan fwyaf o’r gwaith trwy gyfrwng y Gymraeg
Mae yna brinder o bobl gyda sgiliau dwyieithog ar gyfer y swyddi canlynol:
- Gwaith Cymdeithasol
- Deintyddiaeth
- Yr Heddlu
- Nyrsio – yn enwedig Gofal Iechyd Meddwl
- Therapyddion Lleferydd a Therapyddion Iaith
- Ffisiotherapi
- Radiograffeg
- Cyngor Gyrfaoedd
- Dysgu, yn enwedig CDT, Ffiseg a Mathemateg
- Technoleg Darlledu
- Cyllid
- Rheoli Gweinyddol
- Rheoli Busnes
- Llywodraeth Leol – yn enwedig meysydd Technoleg, Cyllid a Iechyd yr Amgylchedd
- Arlwyo a’r diwydiant croeso
- Dylunio graffeg
Edrychwch yn eich papur newydd lleol er mwyn cael gweld cymaint o gyflogwyr sydd yn hysbysebu swyddi yn ddwyieithog neu yn dweud bod sgiliau Cymraeg yn fanteisiol, yn ddymunol neu’n hanfodol ar gyfer ymgeisio am swyddi o bob math.
Hefyd, chwilotwch ym mas-data’r safle hon am gwmnïau sydd yn dweud eu bod yn cyflogi bobl sydd yn defnyddio’r Gymraeg yn sgil gwaith ar wahanol lefelau.
